بايقاۋ Kazakh Tourism, تۋريزم جانە سپورت مينيسترلىگى مەن «اتامەكەن» ۇكپ قولداۋىمەن ۇيىمداستىرىلدى. ونىڭ نەگىزگى ماقساتى - ەلىمىزدەگى سۋ ايدىندارىندا قىزمەت كورسەتۋدىڭ جانە قاۋىپسىزدىك ستاندارتتارىن ارتتىرۋ.
بيىل ساراپتامالىق كوميسسيانىڭ نازارىنا وڭىرلەردەن 30 استام جاعاجاي ۇسىنىلدى. ونىڭ ىشىندە جەكەمەنشىك ءارى قالالىق جاعاجايلار دا بار. باعالاۋ قر ست 3013-2017 ۇلتتىق ستاندارتىنا سايكەس جۇرگىزىلدى ءارى حالىقارالىق Blue Flag باعدارلاماسىنىڭ جەكەلەگەن كريتەريلەرى ەسكەرىلدى.
ىرىكتەۋ كەزىندە اكۆاتوريانىڭ قاۋىپسىزدىگى, سانيتارلىق جاعدايى مەن ينفراقۇرىلىمى, قۇتقارۋشىلار مەن مەديتسينالىق بەكەتتەردىڭ بولۋى, جاعالاۋدىڭ ىڭعايلىلىعى, اۋماقتى جوسپارلاۋ, سۋدىڭ ساپاسىن تۇراقتى تۇردە باقىلاۋ جانە قوقىستى بولەك جيناۋ, كۇن ەنەرگياسىمەن جۇمىس ىستەيتىن دۋش كابينالارى, ەكولوگيالىق ءبىلىم بەرۋ ءىس-شارالارىن قامتيتىن ەكولوگيالىق باستامالار ەسەپكە الىندى.
ساراپتامالىق كوميسسيانىڭ باعالاۋى بويىنشا توپ-3 ۇزدىك جاعاجاي انىقتالدى. ولار جيناۋعا مۇمكىن بولعان 170 بالدان تومەندەگىدەي ناتيجە كورسەتتى. ءى ورىن – Wyndham Garden Beach (اقمولا وبلىسى, بۋراباي) –166 بالل; ءىى ورىن – №5 قالالىق جاعاجاي (الماتى وبلىسى, قوناەۆ ق.) – 145,5 بالل; ءىىى ورىن ورتالىق جاعالاۋ (پاۆلودار وبلىسى, پاۆلودار ق.) – 145 بالل.
ۇزدىك جاعاجايلار تازا ءارى قاۋىپسىز اكۆاتورياسىمەن, دامىعان ينفراقۇرىلىمىمەن (كيىم اۋىستىراتىن بولمەلەر, دۋش كابينالارى, دەمالىس ايماقتارى, ءدامحانالار) ەرەكشەلەندى. سونداي-اق بالالارمەن كەلەتىن وتباسىلارعا قولايلىعىمەن, تابيعاتتى ساقتاۋ ماقساتىنداعى ەكولوگيالىق شەشىمدەردى جانە باستامالاردى جۇزەگە اسىرۋ جاعى دا ەسكەرىلدى.
«ۇزدىك جاعاجاي» باعدارلاماسى – بۇل ەلىمىزدىڭ ەڭ ۇزدىك جاعاجايلارىن انىقتاۋ عانا ەمەس, سونىمەن قاتار وڭىرلەردى وزدەرىنىڭ دەمالىس ايماقتارىن حالىقارالىق ستاندارتتارعا سايكەس دامىتۋعا ىنتالاندىرۋ. اقمولا, اتىراۋ, قوستاناي, قاراعاندى جانە الماتى وبلىستارىنىڭ وڭىرلىك كاسىپكەرلەر پالاتالارى مەن اكىمدىكتەرىنە بەلسەندى ارىپتەستىك تانىتىپ, ءبىزدىڭ باستامانى قولدادى», - دەدى «Kazakh Tourism» ۇك» اق باسقارما توراعاسىنىڭ مىندەتىن اتقارۋشى دانيەل سەرجان ۇلى.
ەندى «ۇزدىك جاعاجاي» باعدارلاماسى جىل سايىن ۇيىمداستىرىلماق.
